ગોધરા તંત્ર દ્વારા ફાયર સેફ્ટીના અભાવ બદલ ૨૫ ટ્યુશન ક્લાસ અને ૩ કોમ્પ્લેક્સને નોટિસ
લખનઉમાં તાજેતરમાં સર્જાયેલી આગની ગોઝારી દુર્ઘટના બાદ ગોધરાનું વહીવટી તંત્ર અને ફાયર વિભાગ સફાળું જાગ્યું છે. ગોધરા શહેરમાં ફાયર સેફ્ટીના નિયમોનો ભંગ કરતી ઇમારતો અને સંસ્થાઓ સામે તંત્ર દ્વારા સઘન કાર્યવાહી હાથ ધરવામાં આવી છે. આ ઝુંબેશ અંતર્ગત ફાયર સેફ્ટીના પૂરતા સાધનો અને સુવિધાઓના અભાવ બદલ શહેરમાં ધમધમતા ૨૫ જેટલા ટ્યુશન ક્લાસીસ અને ૩ કોમ્પ્લેક્સને નોટિસ ફટકારવામાં આવતા સંચાલકોમાં ફફડાટ વ્યાપી ગયો છે.
ફાયર વિભાગ દ્વારા હાથ ધરવામાં આવેલી આ કડક કાર્યવાહીમાં સંબંધિત સંચાલકોને સાત દિવસનું અલ્ટિમેટમ આપવામાં આવ્યું છે. વિભાગે સંચાલકોને નોટિસ આપીને સ્પષ્ટપણે તાકીદ કરી છે કે આગામી સાત દિવસની અંદર ઇમારતમાં રહેલી તમામ ફાયર સેફ્ટીની ખામીઓ સત્વરે દૂર કરી લેવામાં આવે અને સરકારના ફાયર સુરક્ષાના નિયમોનું ચુસ્તપણે પાલન સુનિશ્ચિત કરવામાં આવે.
વહીવટી તંત્ર દ્વારા અંતમાં આકરી ચેતવણી પણ ઉચ્ચારવામાં આવી છે કે જો આપેલી સાત દિવસની સમયમર્યાદામાં સંચાલકો દ્વારા ફાયર સેફ્ટીની યોગ્ય સુવિધા ઉભી કરવામાં નહીં આવે, તો નોટિસ પામેલા તમામ ટ્યુશન ક્લાસીસ અને કોમ્પ્લેક્સના માલિકો સામે કડક કાયદેસરની કાર્યવાહી હાથ ધરવામાં આવશે. ઇમારતોને સીલ કરવા સુધીનાં પગલાં પણ લેવાઈ શકે છે.
